நீயா...நானா.....?

பட்டாபட்டி சார்..வணக்கம்..
சார்..ரொம்ப கஷ்டப்பட்டு, தட்டுத்தடுமாறி, ஸ்கூல் படிச்சுட்டேன்..  எனக்கு ரொம்ப  நாளா, ஷேர் மார்க்கெட்ல இறங்கி, பணக்காரனா ஆகி, அவனுக மாறியே வாழனுமுனு ஆசை..என்ன பிரச்சனைனா..இந்த ஷேர்  மார்க்கெட் பற்றி, ஒரு மண்ணும்  மண்டையில ஏறமாட்டீங்குது..  நண்பர்களை கேட்டா, சரக்கு  வாங்கித்தா, சொல்லிக்கொடுக்கிறேனு சொன்னாங்க.. சரி...பொழைக்க வழி  சொல்றவங்களுக்கு, சரக்கு வாங்கி கொடுப்பது தப்பேயில்லனு, சாஸ்திரத்தில சொல்லியிருக்கே..வாங்கடானு, ஒரு நல்ல நாள்ல கடைக்கு கூட்டிக்கிட்டு போனேன்..

படுபாவிக.. தண்ணியப்போட்டு ,அங்கேயே ஆப்பாயில்  எடுக்கிறானுக.. கையிலிருந்த காசெல்லாம் எடுத்து கல்லாவுல கட்டிப்புட்டு திரும்பிப் பார்க்காம ஓடி வந்துட்டேன்..சோறு  துன்னனுமே..அதுக்கு ஏதாவது வழி பண்ணலாமுனு, சலூன் கடை வைச்சுட்டேன்

சார்.. ஆனாலும் கை அரிக்குது.. நீங்கதான் என் வாழ்க்கையில ஒளி ஏற்றி
வைக்கனும்..எனக்கு மட்டும் இந்த ஷேர் மார்க்கெட்டைப்பற்றி, புரியறமாறி சொல்லீட்டீங்க..பட்டாபட்டி சார்.. எங்க  கடையில, உங்களுக்கு கட்டிங் + சேவிங் ப்ரீ...
அன்னூர் ஆளவந்தான்

-----------------------------------------------------

வணக்கம் அன்னூர் ஆளவந்தான்..ஏய்யா..இப்பத்தான் கை மேல தொழில
வெச்சிருக்கையே..அப்புறம் ஏன் காண்டு புடிச்சு அலையிறே?.. இங்க பாரு..முடி
வெட்டறது ,டாக்டர் தொழில் மாறி..எல்லா சீசன்லையும் காசு பார்க்கலாம்..

ஷேர்..ஷேர்னு கூவிக்கிட்டு இருக்கான்களே..அது ஒரு கானல் நீரருப்பா..கொஞ்சம்  மூளைய யூஸ் பண்ணினா, காசு பார்க்கலாம்..இல்ல கட்டின கோமணத்தை அவுத்து  விட்டுடுவானுக..இன்னொரு விசயம்..ஆமா..இப்ப எதுக்கு பணக்காரனாகனுமுனு பரபரக்குறே?..அவனுக சோத்தை தின்னாலும், காலையில அதுதான் வரும்.. நீ  தின்னாலும் அதுதான் வரும்..

சரி..உனக்கு ’சனி’ குட்மார்னிங் சொல்லனுமுனு இருந்தா, நான் நடுவுல என்ன
செய்யமுடியும?..இந்த ஷேர் மார்க்கெட்னா என்னானு ஒரு கதை சொல்றேன்..
கேட்டுக்கோ..அதுக்கு மேல உன் விருப்பம்...

இரு அழகான கிராமம்..மக்கள் சந்தோசமா விவசாயம் பண்ணிக்கிட்டு, குடும்பம் குட்டியோட இருக்கானுக..நல்லது கெட்டதுக்கு கூடிக்கிறதும், சின்ன சின்ன சண்டை  சச்சரவுமா, வாழ்க்கை ஆனந்தமா ஓடிக்கிட்டு இருக்கு..என்ன ஒரு பிரச்சனைனா,  அங்க குரங்கு தொல்லை கொஞ்சம் அதிகம்..ஆக்கி வெச்ச சோத்தை, வீட்டுக்குள்ள  புகுந்து , தட்டுல போட்டு சாப்பிடற அளவுக்கு உரிமையோட சுத்திக்கிட்டு இருக்கு..

அப்ப ஒரு முதலாளி அந்த கிராமத்துக்கு போனான்..கிராமத்தான் வாழ்க்கைமுறையை  பார்த்ததும், அவனுக்கு எப்பம்போல வயிரெறியுது..என்னடா பண்ணலாமுனு  யோசிக்கிறான்..

ஒரு நாள், ஊர் மத்தியில நின்னுக்கிட்டு, ”அய்யா வாங்க..அம்மா வாங்க..கடவுள்,  என் கனவில வந்தாரு”னு கூவறான்..கடவுள்னு சொன்னதும், மக்கள் போட்டது போட்டபடி மைதானத்துல கூடறாங்க..

கூட்டத்தை பார்த்துட்டு, “மக்களே..நான்  பிறவிப்பணக்காரன்..ஒரு நாள், நல்ல தூக்கத்தில கடவுள் வந்து, இப்படி ஒரு கிராமம் இருக்கு..அங்குள்ள மக்கள்,குரங்கினால பெரும் பிரச்சனைய சந்திக்கிறாங்க..நீ போயி அவங்களுக்கு, ஏதாவது  நல்லது பண்ணுனு சொல்லியிருக்காரு”னு சொல்றான்.

மக்கள்தான் விவரமில்லாதவனுக ஆச்சே..சந்தோசமா தலையாட்டுரானுக அவனுக தலை போவது தெரியாமல்..    முதலாளி சொல்றான்..”மக்களே.. இனிமேல உங்களுக்கு  நல்ல காலம்  வந்திடுச்சு..தொல்லை தருகின்ற குரங்கை பிடித்து என்னிடம் தந்தால்,  ஒரு குரங்குக்கு  ரூ 100 தருகிறேனு.. அது வரை , இந்த கிராமத்தில ஒரு வீட்டை வாடகைக்கு எடுத்து தங்கிக்கொள்கிறேன் “

மக்களும், மண்டையாட்டிக்கிட்டு, குரங்கு பிடிக்கப்போறானுக..ஒரு வாரம் கழித்து  பிடித்த குரங்குகளுடன் முதலாளி வீட்டுக்கு போனா, அவரு,  1 குரங்குக்கு  ரூ 100 கொடுத்து, எல்லா குரங்கையும் வாங்கி கூண்டுல அடைச்சுட்டாரு..

இப்ப மக்களை பார்த்து, “இனிமேல் பிடிக்கும் குரங்குகளை, ரூ 200 -க்கு வாங்கி
கொள்கிறேனு” அறிக்கை விடறாரு..மக்களும், விவசாயத்தை மறந்து, குடும்பத்தோட குரங்கு வேட்டைக்கு  அலையாருனுக..

ரூ200 ஆச்சே.. ஆசை விடும்மா? .இப்ப கிராமத்தில குரங்குகள்  வேற கம்மியாயிடுச்சு.. அடுத்த வாரம்,  கஷ்டப்பட்டு மீதிக்குரங்குகளை பிடித்து  வருகின்றனர்..சொன்னபடி 1 குரங்கு , ரூ200 செட்டில பண்ணிட்டாரு...

இப்ப....

”நீங்கள் பிடிக்கும் குரங்கு ஒன்றுக்கு ரூ 500 கொடுக்கப்போறனு” முதலாளி
சொன்னதும் மக்கள் விழிப்படைஞ்சிட்டாங்க..ஆகா,  இனி மாமன் மச்சானு கூட்டு  சேர்ந்துக்கிட்டு போனா, நல்லாயிருக்காது.. நாமே, தனித்தனியா பிடிச்சு, ரூ 500  வாங்கி  வாழ்க்கையில செட்டிலாகிடனுமுனு சபதம் போட்டுக்கிட்டு போறானுக..

கடைசியா கிடைத்தது 10 குரங்கு மட்டுமே..நல்லவரும் சொன்னபடி 1 குரங்கு = ரூ 500 கொடுத்திட்டு, “மக்கா..நகரத்தில, என்னோட கடைய, போட்டது போட்டபடி வந்துட்டேன்..அதுவுமில்லாம புள்ள குட்டியப் பார்த்து நாளாச்சு..நான் போயிட்டு, 2 வாரம் கழித்து வருகிறேன்..அதுவரை நம்ம
கணக்குப்பிள்ளை  ( ப.சி இல்ல பாஸ்..) குரங்குகளை பார்த்துக்குவான்..அப்புறம்
சொல்ல  மறந்துட்டேன்..அடுத்த பேஜ்ல 1 குரங்கு, ரூ 1000.. வரட்டா”னு
சொல்லிக்கிட்டு  நகரம் பார்க்கப்போயிட்டாரு..

மக்கள் அலையுறானுக...ஒரு குரங்காவது மாட்டனுமே..சே...கண்ணுக்கு முன்னாடி காசு ஆடுது.. 1 குரங்கு , ரூ 1000 .. விவசாயத்தை விட்டுவிட்டு, காடு மேடா சுத்தறானுக..ஊகூம்.. கிடைக்கலை.. என்னடா பண்றது..சரி வேற ஏதாவது வாங்குவானுகளானு  (நப்பாசை?) , எதுக்கும்,  அந்த கணக்குப்புள்ளைய கேட்கலாமுனு முதலாளி வீட்டுக்குப்போறானுக..

கணக்குப்புள்ளை, காலை விரிச்சுட்டு, கட்டில்ல தூங்கிக்கிட்டு இருக்காரு...
எழுப்பி..எங்க வாழ்க்கைக்கு ஒரு வழி சொல்லுனு அழறானுக..மக்கள் படும்பாட்டை  பார்த்து, கணக்குப்புள்ளை கண்ணுல தண்ணியா வருது.. ”உங்க நிலைமைய பார்த்து  மனசு கஷ்டமாயிருக்கு..என்னோட  முதலாளியா?... இல்ல மக்களா?னு கேள்வி  கேட்டா, நான் மக்கள்னுதான் சொல்லுவேன்..ஏன்னா மங்களோட நானும் ஒரு அங்கம்.  அதனால நாம கூட்டணி வெச்சு காசு  பார்க்கலாம்.. நீங்க என்ன பண்றீங்க..எங்கிட்ட உள்ள குரங்கையெல்லாம், ரூ800  கொடுத்து வாங்கிடுங்க..அடுத்த வாரம் முதலாளி வந்ததும், அவருகிட்ட ரூ 1000 -துக்கு விற்று ரூ 200 லாபம் பார்க்கலாமுனு சொல்றாரு.. 

இப்ப மக்கள் கண்களில் தண்ணீர்..நீர்தான் எங்களை வாழவைத்த தெய்வம்னு  சொல்லீட்டு, இருந்த தோட்டம், வீடு, காடு எல்லாம் விற்றுவிட்டு, குரங்கா வாங்கி  வெச்சுட்டானுக..

இப்ப

• கணக்குப்புள்ளைய காணவில்லை..

• முதலாளி திரும்பவும் வருவானா???

• சும்மா கிடைத்த, குரங்கோட அடக்கவிலை ரூ 800

• விற்கும் விலை ரூ 1000...லாபம் ரூ 200..

சரி அன்னூர் ஆளவந்தான்..
இவ்வளவு தூரம் நூல்பிடிச்சப்மாறி படிச்சிட்டு வந்தீங்க... எங்கிட்ட சில குரங்குகள் இருக்கு சார்..குரங்கு விலை ரூ  700 தான் (அன்னூர்காரங்களுக்கு, 100 ரூபா டிஸ்கவுண்ட்..) .. ஆனா சீக்கிரமா  ரூ 1000 க்குப்போகும்.. வாங்கிக்குங்க பாஸ்...

டிஸ்கி..
சரியாக வைத்தால் சரக்கு உங்களுக்கு..லாபம் எங்களுக்கு...
இல்லாட்டி,  உங்க கோமணம் எங்களுக்கு..லாபமும் எங்களுக்கு..
கடைசியா..ஹி..ஹி...எல்லாமே எங்களுக்கு...ஹி..ஹி

.

.

.